::.. مــرسى الأحــزان..::

المسابقة الرمضانية · 09-13-2009

الحمد لله ، والصلاة والسلام على رسول الله - صلى الله عليه وعلى آله وصحبه وسلم - وبعد:

كل عام وأنتم بخير بمناسبة حلول شهر رمضان المبارك وأهلا بكم معنا في

مسابقة المحقق كونان

أهلا بكم .... أنا المحقق كونان ... كلكم بتعرفوا قصتي مع المجرمين اللي أعطوني عقار سام وبعدين هربوا .. ولما صحيت كان جسمي اتقلص!...

انا حاليا موجود بالأردن ... في زيارة لأحد الأصدقاء ... لكن انا ما برتاح إذا ما مسكت مجرمين ثلاثة باليوم .. ..

انا رح أكون معكم طيلة شهر رمضان المبارك ان شاء الله ...

رح أعرض عليكم قضية حصلت معي شخصيا وأشوف مقدرتكم على حلها وكشف المجرمين واللصوص وحل الألغاز ....

على بركة الله

★ الحلقة 5 ★

" حادث سيارة "

الجمعة الماضية ... كنت بزيارة لأحد أصدقائي ... تعب بعد مباراة ونقلوا المستشفى ... اكتشفوا عنده ارتفاع كرات قدم في الدم ... ومحتاج لراحة ...

المهم ...

وأنا هناك إجا على المستشفى أب ومعه ابنه ... ولما سألته شو القصة؟ حكالي في واحد ضرب ابني بسيارته امبارح وهرب ... واليوم الصبح حس برجله بتوجعه ...
جبته مباشرة هون عالمستشفى ... وما حكيت للشرطة عشان أنا ما بدي أوجع راسي ... وابني الحمد لله كويس بس حكولي رجله طلعت مشعورة ...
والحمد لله على كل إشي ...

أنا ما تركته لحد ما حكالي القصة كاملة ... وقررت أساعده عشان اللي بدعس الناس وبهرب لازم ينعدم مش ينترك ...

قدرت أعرف منه إنه لون السيارة اللي ضربت الولد وكانت أحمر ...
ورقمها "5555-12"... ولما سألت واستعنت بأصدقائي ومعارفي اكتشفت إنه هالسيارة موجودة بحي من الأحياء ... والمشكلة إنه هالسيارة بركبها 3 شباب عايشين مع بعض بنفس الشقة ... لإنهم طلاب جامعة ...
والسيارة مشتركة بينهم ...

رحت عالشقة ولما تعرفت عليهم كانوا :

الأول :

هيثـم

الثاني :

صلاح

الثالث :

معاذ

حكيتلهم تفاصيل القصة ... وعشان أضمن السرية ... سألت كل واحد منهم لحال ... ::

1- لما سألت هيثم قال:

أنا يومها ما طلعت من البيت أصلا ... كان عندي امتحان بالجامعة ثاني يوم ... ونمت بكير عشان أقوم أدرس ... ويا ريتني نجحت ... الدكتور جابلنا امتحان صعب كثير ...
أنا قررت أترك الجامعة وأرجع لأهلي ... مش زابطة معي هالدراسة ...

2- لما سألت صلاح قال:

أنا مشان ما أكذب طلعت يومها بالسيارة .. بس مشوار قريب عشان اشتري دخان ... وحتى لو ... بقول لو ... دعست الولد ... مستحيل أتركه وأهرب ...
شو ما في نخوة بالدنيا يا زلمة ...؟!! وأنا بصراحة مفكر أغيّر لون هالسيارة ... لونها أحمر مثل الدم ... وأنا بخاف من الدم ...

3- لما سألت معاذ قال:
أنا أخذت السيارة ورحت عند شب صاحبي ... وسهرت عنده وروحت ... بس ما شفت ولا ولد بالطريق ... فكيف بدي أدعسه إذا أصلا ما شفته ..؟؟ محققين اخر زمن ..!!! وبعدين إنت شو علاقتك بالموضوع أصلا ..؟!!

وطبعا كالعادة ... المحقق توجو موري ما عرف مين اللي عمل الحادث ...

أنا عرفت الفاعل ... بس ما رح أحكيلكم مين ... احزروا لحالكم ...

وابعثولي رد بسرعه وقولولي مين هو ...

1- هيثم

2- صلاح

3- معاذ

ولكل اللي بجاوبوا صح رح يكسبوا ::

الفائز الأول بمسابقة المحقق كونان

الفائز الثاني بمسابقة المحقق كونان

الفائز الثالث بمسابقة المحقق كونان

الفائز بالقرعة بمسابقة المحقق كونان

مشارك مميز بمسابقة المحقق كونان

:: القوانين ::

1- يمنع تغيير الاجابة ...

2- يحق لكل عضو الإجابة مرة واحدة ...

3- يمنع الدردشة داخل الموضوع ...

مع تحيات فريق عمل وإشراف كووورة أردنية

بالتوفيق للجميع .. رمضان مبارك

وأشكر كل من ساعدني بهذه المسابقة